Die gewilde groep, ADAM, se sukses ken geen perke nie. Hulle is weer onlangs met twee Ghoema-toekennings vereer vir Beste album deur ’n groep of duo en Groep van die jaar, en is ook benoem vir ’n SAMA-toekenning vir Beste pop album.

“Ons is ongelooflik dankbaar vir almal se ondersteuning en ag dit as ’n voorreg om hierdie jaar twee Ghoema-toekennings te kon ontvang.  Natuurlik is die SAMA-benoeming ook vir ons baie spesiaal.  Dit is ons eerste SAMA-nominasie ooit en dit nogal vir ons heel gunsteling album, Hoogtevrees.  Die SAMA’S is verteenwoordigend van ons land en ons ag dit ’n groot eer om genomineer te wees”, sê Hugo Ludik.

Dié groep, wat bestaan uit Hugo Ludik, Reynardt Hugo en Kyle Grant, reik nou gedurende Mei 2017, hulle derde enkelsnit uit.  Dis Al Wat Ek Het  is geskryf deur Hugo.  Hy het een aand gelê en dink oor die feit dat daar gereeld in liefdesliedjies soveel beloftes aan die skoner geslag gemaak word, selfs in ADAM se liedjies, maar dat hy eintlik net ’n gewone ou is en al wat hy het om te gee is liefde.

Luister hier na ’n voorsmakie van die snit:

Om die uitreiking van hierdie enkelsnit te vier loods die groep in samewerking met Starburst Promosies ’n heerlike kompetisie waar die wenners ’n bederfdag saam met ADAM by Askari Game Lodge & Spa kan wen.

Die kompetisie word op 15 Mei 2017 om 10:00 op ADAM se Facebook-blad aangekondig – hou gerus hulle blad dop!