Gehore kla oor die gehalte van Suid-Afrikaanse musiek. Plaatemaatskappye en kunstenaars is besorg oor dalende musiekverkope en krimende inkomste. Die kunstefeeste, borge en programmeerders wonder wat hulle te doen staan om groter gehore te lok en nuwe talent te bevorder.

Die skrywer, Danie Marais, gesels met kenners oor dié kwessies wat die musiekbedryf in die gesig staar vanaf die Artscape Teater kompleks in Kaapstad.

Die eerste paneel bestaan uit Jaconell Mouton, Emo Adams, Willem Breytenbach, Carien Loubser en Churchill Naudé.

Emo Adams se oplossing is dat kunstenaars aan hul brand moet bou, en nie verloor wie hulle is, ten spyte van sponsors nie. Hy meen: “The economy has fallen. Artists don’t have time to wait to be a success. Ons kan nie die effort in sit as borge ons nie aanvaar nie.”

“People see the glamour, but the artist suffer,” voeg hy by. Volgens hom wag kunstenaars nie vir ’n fees om te sê hulle legit nie. Hulle is wie hulle is, en hulle moet bou aan die brand.

Hy sê ook dat kunstenaars versigtig moet wees om nie te generies te raak nie. “Festivals need to be vigilant of repetition.”

Carien Loubser, vervaardiger van die kykNET-reeks, Republiek van Zoid Afrika het ook haar stem dik gemaak, en gesels oor die sukses van dié reeks en hoe sake in die musiekbedryf staan. “Die musiekbedryf word gesien as ’n besigheid, maar ek is geskok om te sien hoe min geld kunstenaars kry,” laat sy van haar hoor.

As jy ’n liedjie stream kry die kunstenaar slegs 7c per stream. Dít beteken die liedjie moet 700 000 streams kry voor jy gelykbreek. “Maar dit [digitale verkope en streaming] groei. Digitale musiek en die verbruik daarvan groei met 4%.”

Volgens haar is die Afrikaanse musiekbedryf R2 biljoen werd. “Dis ’n goeie industrie,” sê sy.

Die musikant en vervaardiger, Jaconell Mouton, het weer op haar beurt gesê: “Jy vestig jouself as ’n idividualis, en ek dink dis hoe dit moet wees.” Sy sê verder om nie iemand anders te wees nie, want hulle sal beter as jy wees.

Sy raak ook die brandpunt van agente aan, en meen: “Daar is bitter min goeie agente en hulle kan jou loopbaan maak of breek.”

Die kletsrymer, Churchill Naudé, volg haar op en sê: “Die Afrikaanse musiekbedryf is stagnant. Mense sê Afrikaans gaan dood. Dit gaan dood as gevolg van kunstenaars, hulle musiek en liedjies.”

Hy meen dat die bedryf nie gaan groei as mense bang is vir nuwe idees. “Die musiekbedryf hou  nie van die waarheid nie en dus groei dit nie,” sê hy.

Willem Breytenbach, mede-direkteur van Lumico, sê weer: “Sosiale media is een van die oplossings vir blootstelling, maar dit is harde werk en nie iets wat jy kan koop nie.”