Karlien van Jaarsveld se nuwe album, Sing Vir Liefde,  is skaars ’n maand terug uitgereik, en dit het reeds 15 000 verkope verbygesteek om as goud geklassifiseer te word. Wat die prestasie nóg meer merkwaardig maak, is dat dit bereik is voor die tweede enkelsnit vanaf die album nog aan radiostasies gestuur is.

Maar dis nie net die bewonderaars wat Karlien hoog aanskryf nie. Apple Music het besluit om hulle gewig agter die titelsnit se musiekvideo te sit en dit was vir agt weke eksklusief beskikbaar op Apple Music, en iTunes. Boonop was die stuur van die enkelsnit met die naam Sing Vir Liefde aan radiostasies op Valentynsdag, ’n besluit wat mense laat regop sit en notisie neem het. Terwyl Karlien nog wik en weeg wat die tweede treffer vanaf die album sal wees, is gesprekke reeds aan die gang oor die skiet van ’n volgende musiekvideo en ’n televisieveldtog wat die blootstelling van haar nuutste CD nog verder sal laat uitkring.

Ten spyte van die feit dat die ekonomie mense hul sente twee keer laat omdraai, bewys die goue status net weer dat hul ook honger is vir ’n goeie Afrikaanse album, een wat propvol lekker-luister popklanke is en waarvan die musiek ’n positiewe boodskap uitdra wat die luisteraar sal laat goed voel. Saam met Karlien, het Johan Vorster en Appel ook bygedra as skrywers.

In Karlien se eie woorde: “Hierdie album laat my vry en lig voel en of alles net oor begin! Ek is mal oor die nuwe album en hoop dat dit dieselfde vir die mense wat dit luister sal bring, lig en ook vrede, en ’n glimlag.”