Fokofpolisiekar het op 3 Oktober 2017 amptelik hul derde vollengte album, Selfmedikasie, vrygestel. Geskiedenis sal terugkyk na Fokofpolisiekar as ’n betekenisvolle kulturele fenomeen. Van meet af aan trek hulle aan drade wat debatte ontketen en wat emosies ontrafel. Hulle krap al vir jare aan die ongemaklike om sodoende ’n vars asem in taal en kultuur te blaas. Die Bende doen so voort met die musiekvideo vir “Parkiebank, herfs 2017”.

Fokofpolisiekar wou iets meer as net ’n musiekvideo maak en só ’n sosiale dialoog aanvuur. Hulle het die visuele kunstenaar, Sean Metelerkamp, genader wat in 2008 ’n musiekvideo van “Antibiotika” vir die groep gemaak het. Die resultaat is ’n visuele stuk wat bestaan uit drie dele:

1. ’n “Konvensionele” musiekvideo;
2. ’n reeks onderhoude wat jong Afrikaners se sienings oor hul plek in die wêreld en hoe hulle hul toekoms sien, dokumenteer en
3. ’n virtuele realiteit-wêreld wat nog net Francois van Coke gesien het.
Die “konvensionele” musiekvideo:
Kyk die “Parkiebank, herfs 2017”-musiekvideo nou:

Die onderhoude:

Fokofpolisiekar het in November 2017 via hul sosiale media-netwerke mense genooi om deel te neem aan die “Parkiebank, herfs 2017”-musiekvideo. Onderhoude is gevoer in Durbanville, Stellenbosch en Bloemfontein. Enigiemand kon meedoen en almal se opinies is gedokumenteer sonder oordeel.

Met die opbou na die musiekvideo se bekendstelling is van hierdie onderhoude oor die afgelope twee weke op Fokofpolisiekar se sosiale netwerke gedeel.

Die portuurgroep se sienswyses is uiteenlopend en inspireer meer vrae as antwoorde.

“Uiteindelik dink ek die punt van die lied is om mense te kry om net weer hulleself belangrike vrae af te vra rondom identiteit en die rol wat hul hulself sien speel in ons breë samelewing om sodoende mense te kry om ingeligte besluite te kan neem,” sê Hunter Kennedy, liriekskrywer en kitaarspeler van die groep. (Parkiebank, herfs 2017” se lirieke is aangeheg).
Hunter Kennedy deel sy denkwyse rondom “Parkiebank, herfs 2017”:
“In die stuk bepeins ek finansiële welvaart as ’n maatstaf van sukses en die etiese dilemma rondom rykdom in ’n land soos ons s’n, waar as gevolg van eeue se kolonialisasie, burgeroorloë, uitbuiting van goedkoop handearbeid en natuurlike hulpbronne, blatante rassistiese onderdrukking en in ’n post-demokratiese milieu, ons slagoffers was van grootskaalse wanbestuur; die ryk/arm lyn nog steeds ’n kleur het.

“Dit handel ook oor die maatstaf van geluk volgens prestasie en die teenstrydigheid van jou hele lewe lank werk om eendag niks te kan doen nie.

“Duidelik het ek ’n probleem met vasgevang wees in ons produk-gedrewe, kapitaal-sentriese bestaan en ek dreig gereeld om te ontsnap, maar ons doen nooit wat ons sê ons gaan nie, nè?

“My haat/liefde verhouding met die media lei na baie slapelose nagte. Ek het soms ‘n dringende paranoia op my van die nuus lees en dan vermaak ek die idee van ontsnap. Van nie net die lokvalle van weelde en rykdom nie, maar ook van die rasse-diskoers in ons land (dit was toe Bell-Pottinger se plan ‘gepeak’ het).

“Ek voel baie keer ek hoort nie hier nie, maar dan wonder ek ook waar ek nou eintlik hoort. In ander stukke het ek al die geldigheid van grense in ons al hoe meer geïntegreerde wêreld bevraagteken en ek voel dat ons, en die mense wat soos ons is, nie dink aan onsself as patriotte nie en dus het ons nie tuisland nie en het in fact nie een nodig nie.

“‘Wat maak ons nog hier?’ is ’n oproep tot aksie om interne ondersoek in te stel en met die vraag te worstel tot jy ’n antwoord het.”

Die groot vraag is nou: “Wat sien Francois in die virtuele realiteit-wêreld?’’

Komma by Kirstenbosch:

Fokofpolisiekar gaan op Sondag, 21 Januarie ’n monster van ’n 90 minute-vertoning lewer by Kirstenbosch in Kaapstad. Die gehoor sal trakteer word op al Die Bende se ou en nuwe gunstelinge en liedjies van die nuwe album, Selfmedikasie, sal vir die eerste keer hier gespeel word. Hulle gaan van die geleentheid gebruik maak om ’n musiekvideo vir hul hartroerende ballade, “Komma”, daar op te neem. Kry nou jou kaartjie om deel te wees van hierdie spesiale gebeurtenis.

Ander Fokofpolisiekar-vertonings om na uit te sien:

Datum: 27 Januarie 2018 (Up The Creek)
Plek: Up The Creek kamp (Felix Unite River Adventures)
Padaanwysings: http://bit.ly/2mxsaDZ
Navrae: Red Hot Events Office / 021 510 0547
Kaartjies: http://www.upthecreek.co.za/tickets/

Datum: 1 Februarie 2018 (Puk Jool)
Plek: Puk Jool plaas
Adres: Puk Kampus / Fanie du Toit-sportterrein
Kontak: Leon – 082 492 3362
Optredetyd: 22h00
Kaartjies: R120 per aand
Voorverkope: Jool kantoor – 018 299 2882 or door

Datum: 4 Maart 2018 (Concerts in the park)
Program: Fokofpolisiekar, MR Cat & The Jackal & Joe Emilio
Plek: De Waal Park
Adres: Moltenostraat, Kaapstad
Tyd: 3 – 6pm
Kaartjies: GRATIS

Datum: 5 Maart 2018 (Woordfees)
Plek: Jan Marais natuurreservaat
Adres: straat, Mostertsdrift, Stellenbosch
Optredetyd: 18h30
Kaartjies: R100 – http://bit.ly/2mHP3Fp

Datum: 23 Maart 2018 (International tattoo convention)
Plek: The Lookout, V&A Waterfront
Adres: Granger Bay Blvd, V & A Waterfront
Kaartjies: R195 – R590 http://bit.ly/2mDG2xm

Datum: 31 Maart 2018 (Lush Festival)
Plek: Linwood Guest Farm
Adres: R711, Clarens, Vrystaat – http://bit.ly/2myQLIv
Kaartjies: R545 – R1,295 http://bit.ly/2DjK7QH