“Dawid Minnaar vertolk al die karakters uitmuntend – Momo, Ibrahim, straatvroue, sy ma en pa. Deur net sy hand effens anders te draai, sy stemtoon te lig of te verdiep, staan hierdie mense voor jou geestesoog. Jy drentel agter hulle aan en laat hulle moeilik agter.”

Só lees Laetitia Pople se resensie van Dawid Minnaar in die eenmanvertoning Monsieur Ibrahim en die blomme van die Koran by die KKNK in 2017. Minnaar is boonop genomineer vir die Fiësta vir beste spel in ’n solo-vertoning en ’n KKNK-Kanna vir beste akteur.

Teaterliefhebbers in Stellenbosch en Pretoria het binnekort die geleentheid om hierdie drama te ervaar. Monsieur Ibrahim en die blomme van die Koran speel af in ’n Joodse kwartier in Parys in die 1960’s, waar die gekwelde Joodse seun Moses (of Momo) ’n onwaarskynlike vriend in ’n eensame Moslem-winkeleienaar, Monsieur Ibrahim, vind. Momo se skreeusnaakse, maar tog hartverskeurende, storie begin wanneer hy sy maagdelikheid in ’n bordeel op 11 verloor. Ibrahim is ’n toevlug vir Momo, gee hom raad en leer die vroegryp seun geleidelik dat daar meer in die lewe as prostitusie is en om kruideniersware te steel.

Wanneer Momo se pa – ’n passiewe, aggressiewe prokureur wat sy seun verwaarloos – verdwyn en dood gevind word, neem Ibrahim die weeskind aan. Die twee besluit om ’n reis deur Europa na Monsieur Ibrahim se geboorteplek te onderneem, wat hulle by die belangrikste kruispad in hul lewens bring. Soos die snaakse en voortreflike verhaal ontvou, wys dit hoe die belangrikste lesse oor lewe en dood geleer word wanneer ons dit die minste verwag.

Dié produksie is ’n ko-produksie van Kunste Onbeperk en die Suidoosterfees, word moontlik gemaak deur NATi en ondersteun deur die Franse Instituut in Suid-Afrika (IFAS). Philip Rademeyer hanteer die regie en ontwerp. Die oorspronklike teks, Monsieur Ibrahim et les Fleurs du Coran, is geskryf deur Éric-Emmanuel Schmitt en vertaal deur Naòmi Morgan. Schmitt het ook Oskar en die pienk tannie, die gewilde eenvrou-vertoning met Sandra Prinsloo, geskryf, waarvoor Morgan die vertaling hanteer het.

Monsieur Ibrahim en die blomme van die Koran is van 2 tot 5 Maart by die Hoërskool Luckhoff tydens die US Woordfees te sien. Kaartjies kos R120 tot R140 (vooraf) en R130 tot R160 (by die deur). Die produksie is 90 minute lank. Gehore in Gauteng kan dié stuk op 21 April om 20:00 en 22 April om 17:00 by die Atterbury Teater in Pretoria sien. Kaartjies hier kos R160 (in die voorste blokke) en R140.